話咁快，包包嘅n班生涯完結了
包包學校係新校，11月先開始上學
12月正式獨自上堂，幾乎每日都喊住返學 XD
記得頭幾日帶佢返學，一落小巴佢就扁咀加憂鬱樣，行上學校嗰幾級樓梯開始谷眼淚，到入門口就大喊mami mami，但對腳係會自己行入學校嘅，好明顯係唔捨得媽咪但又想返學 XD
雖然只係大半年前，睇返啲相嗰時真係好bb呀
到放完xmas假加上同爸媽去左一轉日本玩，一月返返學時又轉坐校車，結果又喊左一個星期 XD
但係每日放學問佢返學開唔開心
佢都一定話開心，小朋友心理就係咁得意
包包好喜歡返學
其中一個原因係佢個班主任miss yip好錫佢
知我係working mum，初初包包日日喊時仲一星期call我三四次，話我知包包喺學校嘅情況。
包包撞親，流鼻水，佢都一放學就打畀我，好多媽媽都話好難得老師會咁好，實在感恩!
包包有一排學曳左，會出手打人，雖然講左n次話打人唔啱，但包包都唔聽，結果我就請教miss，果然miss yip訓話完之後就唔打人!
仲有就係戒片，有學校嘅幫助，包包戒片係超級順利，在家也甚少瀨尿，實在令我輕鬆不少
一入學校，個個老師都記得佢個名，仲話包包好乖仔，包包係好自豪老師讚佢，佢會笑得好開心又好得戚架!
學校係超級happy school活動教學，無功課，見到佢地上堂嘅相，就知小朋友返學真係好開心好多野玩!
包包一向說話唔叻，返學後開始多野講好多，仲記得同學仔嘅名呢! 而且勁鍾意唱歌，雖然歌喉麻麻，但我感覺到佢好快樂 :)
學校係英語教學為主，讀左幾個月，包包係可以明白晒老師講咩，同工人姐姐都有時會用英文對答，有時都好surprise 佢識咁多!
7月有一日係學校嘅第一屆畢業典禮，其實n班係無份畢業，但每級都有表演。
畢業典禮於元朗劇院舉行，第一屆只有8個學生畢業。有畢業生致辭，全用英文，好叻仔!
呢日個畢業典禮於下午4時開始，之前因為要rehearsal, 包包呢日完全無nap，真係有點擔心佢太攰! (結果呢日佢未夠9點已經訓左!) 等所有程序完左，就到表演環節。n班係第一輪出場……
呢個傻豬，上到台淨係周圍望，完全唔記得要跳舞，我諗佢應該係諗緊“點解下面咁多人嘅? 點解啲燈咁燦眼架”
前幾日已經知道包包要扮蜜蜂，見到佢出場時真係好興奮! 點解我個仔咁可愛架!! (原諒我嘅浮誇，做阿媽嘅永遠覺得自己個仔最可愛)
Anyway，呢班咁可愛嘅小朋友，無論佢地跳成點，台下班父母都一樣咁欣賞佢地!
之後就到k1, k2, k3 表演，可以睇得出佢地花左好多心思，無論服裝佈景都做得好好! 對於一間只成立一年，又咁少師生嘅學校，真係覺得學校好犀利!!
之後就係謝幕啦，啲小朋友全部好有系統排好位，台下嘅家長都不禁大拍手掌!!
包包見到媽媽接放學，超級開心呢
老實講，畢業典禮後我同老公都覺得好impressive，一度好想包包繼續留喺度讀，但現實歸現實，全日班對我地黎講好重要，唯有見步行步。
畢業典禮後仲要返多一星期學。
最後一天上學，爸媽都無請假，因為今年太多假要請了。但我都預備左心意卡同朱古力畀兩位班主任，仲叮囑包包要親手送畀老師。
包包最後一次穿上呢套校服。雖然同佢講左放暑假，但好明顯佢係唔知咩係放暑假，也唔知自己原來遲啲要轉校 :(
miss yip之後都有call我，話睇完我張卡感動到喊，我也再次感謝老師呢幾個月對包包嘅照顧!
回家還發現老師整左個 portfolio! 非常精美!
老師果然好了解包包
佢最鍾意車!
裡面仲有好多平時上堂嘅相，想像到返學好多野玩!
再見了!
唔知第時細佬會唔會讀呢間學校呢?
