N班開學啦～(上)

包包終於返N班啦～等到頸都長

話說上年apply左幾間N班，但包包係細b，最後得三間有得in。可惜一間撞正台灣之旅，另一間interview嗰日包包發高燒，結果只in一間。基本上呢間私校係必收，但最後只有pm offer。

由於包包係個早睡早起嘅寶寶，午睡係必須嘅！如果要我迫佢唔訓去返學，我覺得好殘忍，而且佢都唔會開心(一定會發癲)。

咁啱畀我知道元朗有間幼稚園開幕，呢間學校(簡稱學校T)其實係由天水圍搬來元朗(之前新聞都有報導過，佢地個校址畀另一大私校以更高價錢收左)。而之前天水圍時嘅comments都幾好。去左interview，覺得啲老師相比之前嗰間有愛心好多，包包都好鍾意呢間學校，最重要係佢收左包包讀am！所以即使之前嗰間交晒留位費同買晒校服，都決定畀包包轉讀學校T。

由於學校T係新校，又剛剛先裝修好，到10月時(包包足兩歲)佢都未攞到N班牌照，(但已有K牌照)，呢個係我完全估唔到嘅！我地可以做嘅就只有等。

到11月初，學校打來話就快攞到牌啦，叫我地去上適應班，仲費用全免！而且一班只有8個小朋友，小班教學真係好好。雖然等到11月先有學返，但覺得學校都好有heart!

包包就咁返左3星期適應班，因為有家長/姐姐陪上堂，所以包包返得好開心！返左學後，喺屋企多左好多野講！雖然都夾住大量bb話 XD。一同佢唱學校教嘅歌就勁開心！最好嘅係佢返學後晚晚都訓得好好！一覺訓天光呢～

第一日返適應班，幾精神！

學校咁多野玩，更係開心啦～

11月尾，學校通知我地攞到牌啦～喺短短三日內，要買校服、鞋、襪等等返學要用嘅野！因為太急，都無時間睇鞋，只喺千色買左普通貨色。又發現原來啲襪好貴！

好在媽媽我一早預備左某些包包嘅返學用品。name label, 布姓名貼，白襪(原來學校仲要灰襪)，手巾仔。其實仲買左手巾盒同杯(但學校有提供)。

姐姐洗完校服，我就密密聯上姓名貼。雖然好攰，但作為母親，自己係非常樂意去做！雖然聯得唔太靚XD

12月1日，終於到了包包返學嘅大日子，媽媽我真係百感交集！包包大個仔啦～

畀個good自己！

媽媽我只係送包包上小巴，由姐姐帶佢返學。因為我知道如果我送佢上學，佢一定會爆喊唔畀我走！而且我之前已經陪過包包上適應班，都已經知道佢嘅上課模式！

第一日嘅情況係點呢？miss中午已經打電話畀我(真係好好呀)，話包包喊左10分鐘，其餘時間都好ok！

第二日

Lunch後外籍miss打畀我，話包包呢日返學無喊啦，只係間中眼濕濕。但就放學時喊，因為佢心急想走但又未到佢所以喊 XD

第三日

姐姐話佢入學校時有喊呀，但放學就無喊。

其實媽媽我都真係好欣慰架啦，包包表現都ok吖，最重要係我問佢返學開唔開心，佢好快就答開心！不過我每次同佢講返學好開心，咁就唔好喊啦，好唔好？佢又會答好架！

希望包包好快適應啦！

一星期後再報告！